ການຈ່າຍເງິນສົມທົບ

ສະມາຊິກອປສ ທຸກຄົນເຖິງວ່າຈະໄດ້ປະກັນຕົນນຳ ອປສ ແບບບັງຄັບ ຫຼື ສະໝັກໃຈກໍຕາມ ຕ້ອງໄດ້ຈ່າຍເງິນສົມທົບເຂົ້າກອງທຶນປະກັນສັງຄົມທຸກໆເດືອນ ໂດຍຊ້າສຸດບໍ່ໃຫ້ກາຍວັນທີ 15 ຂອງເດືອນຖັດໄປ.

ຜູ້ໃຊ້ແຮງງານມີໜ້າທີ່ໂອນເງິນສົມທົບທັງສ່ວນຂອງຕົນເອງ ແລະ ສ່ວນຂອງຜູ້ອອກແຮງງານ ເຂົ້າກອງທຶນປະກັນສັງຄົມ. ອັດຕາເງິນສົມທົບທັງໝົດ ແມ່ນເທົ່າກັບ 9.5% ຂອງເງິນເດືອນຜູ້ອອກແຮງງານແຕ່ລະຄົນ ຊຶ່ງ ອປສ ໄດ້ກຳນົດເພດານເງິນເດືອນທີ່ຈະນຳມາຄິດໄລ່ເປັນເງິນສົມທົບໄວ້ສູງສຸດແມ່ນ 1,500,000 ກີບ ໝາຍຄວາມວ່າຜູ້ໃດທີ່ມີເງິນເດືອນສູງກວ່ານີ້ ກໍໃຫ້ເອົາພຽງແຕ່ 1,500,000 ກີບ ເທົ່ານັ້ນ ມາຄິດໄລ່ເປັນເງິນສົມທົບ. ໃນອັດຕາເງິນສົມທົບ 9.5% ນີ້ໄດ້ມາຈາກ ຜູ້ໃຊ້ແຮງງານຈ່າຍ 5% ແລະ ຜູ້ອອກແຮງງານຈ່າຍ 4.5% ໂດຍແຕ່ລະເດືອນຜູ້ໃຊ້ແຮງງານ ມີໜ້າທີ່ຫັກເງິນສົມທົບສ່ວນທີ່ເປັນຂອງຜູ້ອອກແຮງງານ ຈາກເງິນເດືອນຂອງຜູ້ອອກແຮງງານນັ້ນເອງ ເພື່ອຈ່າຍເຂົ້າກອງທຶນປະກັນສັງຄົມ. ຖ້າຜູ້ໃຊ້ແຮງງານຫາກບໍ່ຫັກເງິນສົມທົບໃນສ່ວນທີ່ເປັນຄວາມຮັບຜິດຊອບຂອງຜູ້ອອກແຮງງານໄວ້ແລ້ວ ຜູ້ໃຊ້ແຮງງານກໍຕ້ອງມີພັນທະຈ່າຍເງິນສົມທົບທັງໝົດເຂົ້າກອງທຶນປະກັນສັງຄົມພຽງແຕ່ຝ່າຍດຽວ.

ລາຍຮັບຂອງກອງທຶນປະກັນສັງຄົມ ໄດ້ມາຈາກໃສແດ່?
ແຫຼ່ງລາຍຮັບຂອງກອງທຶນປະກັນສັງຄົມໄດ້ມາຈາກ:

• ເງິນສົມທົບຈາກຜູ້ໃຊ້ແຮງງານ ແລະ ຜູ້ອອກແຮງງານ (9.5% ຂອງເງິນເດືອນຜູ້ອອກແຮງງານ)

• ເງິນດອກເບ້ຍຈາກການລົງທຶນຂອງກອງທຶນ

• ແຫຼ່ງລາຍຮັບອື່ນ (ເຊັ່ນ: ເງິນຊ່ວຍໜູນຈາກລັດຖະບານ ແລະ ພາກສ່ວນຕ່າງໆ, ເງິນປັບໄໝຈາກການຈ່າຍເງິນສົມທົບຊັກຊ້າ ແລະ ອື່ນໆ)

ກອງທຶນປະກັນສັງຄົມ ປະກອບດ້ວຍກອງທຶນຍ່ອຍໃດແດ່?
ກອງທຶນປະກັນສັງຄົມແບ່ງອອກເປັນ 4 ກອງທຶນຍ່ອຍດັ່ງນີ້:

1. ກອງທຶນປະກັນສຸຂະພາບ (ນຳໃຊ້ສຳລັບອຸດໜູນປິ່ນປົວສຸຂະພາບ)

2. ກອງທຶນອຸດໜູນໄລຍະສັ້ນ (ນຳໃຊ້ສຳລັບອຸດໜູນເກີດລູກ, ອຸດໜູນເຈັບປ່ວຍ ແລະ ອຸດໜູນເສຍຊີວິດ)

3. ກອງທຶນອຸດໜູນໄລຍະຍາວ (ນຳໃຊ້ສຳລັບອຸດໜູນບຳນານ, ອຸດໜູນເສຍອົງຄະ ແລະ ອຸດໜູນຄອບຄົວຂອງຜູ້ເສຍຊີວິດ)

4. ກອງທຶນອຸປະຕິເຫດແຮງງານ ຫຼື ພະຍາດອາຊີບ ຊຶ່ງນຳໃຊ້ສະເພາະແຕ່ກໍລະນີອຸປະຕິເຫດແຮງງານ ແລະ ພະຍາດອາຊີບເທົ່ານັ້ນ.

ຜູ້ໃຊ້ແຮງງານ (ນາຍຈ້າງ) ມີພັນທະຫຍັງແດ່ຕໍ່ການປະກັນສັງຄົມ?

1./ ການຂຶ້ນທະບຽນ:
ສິ່ງ​ທຳ​ອິດທີ່​ຜູ້​ໃຊ້​ແຮງ​ງານ​ຕ້ອງ​ໄດ້ປະຕິບັດ ກໍ​ຄື​ການ​ຂຶ້ນ​ທະບຽນ​ປະກັນ​ສັງຄົມ​ນຳ ອປສ ຊຶ່ງ​ວິ​ສາ​ຫະກິດ​ທີ່​ມີ​ພະນັກງານ​ແຕ່ 10 ຄົນ​ຂຶ້ນ​ໄປ ຈຳ​ຕ້ອງໄດ້​ຂຶ້ນ​ທະບຽນ​ໂດຍ​ບັງຄັບ ​ແລະ ສຳລັບ​ວິ​ສາ​ຫະກິດ​ທີ່​ມີ​ພະນັກງານ​ຕຳ່​ກວ່າ 10 ຄົນ ກໍ​ສາມາດ​ສະໝັກ​ໃຈ​ເຂົ້າ​ເປັນ​ສະມາຊິກ ອປສ ​ໄດ້. ​ໃນ​ການ​ຂຶ້ນ​ທະບຽນ ຜູ້​ໃຊ້​ແຮງ​ງານ​ຕ້ອງ​​ໄດ້ປະກອບ​ແບບ​ຟອມ(SSO 1-01)​ແລະ ຜູ້​ອອກ​ແຮງ​ງານ​ກໍ​ຕ້ອງ​ໄດ້​ປະກອບ​ແບບ​ຟອມ (SSO 1-02).ແລ້ວ​ນຳ​ສົ່ງ​ໃຫ້ ອປສ.

2./ ການລາຍງານປະຈຳເດືອນ
ໃນ​ແຕ່ລະ​ເດ​ືອນຜູ້​ໃຊ້​ແຮງ​ງານ​ຕ້ອງ​ໄດ້​ແຈ້ງ​ໃຫ້ ອປສ ຊາບ​ກ່ຽວ​ກັບ​ເງິນ​ເດືອນ​ຂອງ​ຜູ້​ອອກ​ແຮງ​ງານ​ແຕ່ລະຄົນ ພ້ອມ​ດ້ວຍ​ຂໍ້​ມູນ​ການ​​ເພີ່ມ ຫຼື ຫຼຸດ​ຂອງຈຳນວນ​ຜູ້​ອອກ​ແຮງ​ງານ. ສຳລັບ​ຜູ້​ອອກ​ແຮງ​ງານ​ທີ່​ເຂົ້າ​ວຽກ​ໃໝ່ ກໍ​ຕ້ອງ​ໄດ້​ແຂ້​ງຂຶ້ນ​ທະບຽນ​ນຳ ອປສ SSO. ແລະ ສຳລັບຜູ້​ທີ່​ອອກ​ຈາກ​ວຽກ ກໍ​ຕ້ອງ​ໄດ້​ແຈ້ງ​ໃຫ້ ອປສ ຊາບ​ເຊ່ັນ​ກັນ ພ້ອມ​ທັງ​ລະບຸ​ວ່າ​ຜູ້ກ່ຽວ​ໄດ້​ອອກ​ຈາກ​ວຽກ​ນັບ​ແຕ່​ມື້​ໃດ.

1. ແບບ​ຟອມທີ່​ໃຊ້​ປະກອບ​ສຳ​ລັບ​ການ​ແຈ້ງ​ຈ່າຍ​ເງິນ​ສົມທົບ​ ​ແລະ ກໍລະນີ​ອື່ນໆ​ທີ່​ກ່ຽວຂ້ອງປະກອບ​

   • ແບບ​ສະ​ແດງ​ການ​ຈ່າຍ​ເງິນ​ສົມທົບ ອປສ SSO 2-01 (ແບບລວມ)

   • ແບບ​ສະ​ແດງ​ການ​ຈ່າຍ​ເງິນ​ສົມທົບ ອປສ SSO 2-02 (​ແບບ​ລະອຽດ)

   • ແບບ​ແຈ້ງ​ການ​​ອອກວຽກ​ຂອງ​ຜູ້​ປະກັນ​ຕົນ ອປສ SSO 1-07

   • ແບບແຈ້ງຜູ້ປະກັນຕົນກັບເຂົ້າເຮັດວຽກ ຊຶ່ງນຳໃຊ້ສຳລັບຜູ້ທີ່ເຄີຍຂຶ້ນທະບຽນເປັນຜູ້ປະກັນຕົນມາແລ້ວ ອປສ SSO 1-04

   • ແບບແຈ້ງການປ່ຽນແປງຂໍ້ມູນຂອງວິສາຫະກິດ ອປສ SSO 1-06

   
   ຖ້າຫາກວິສາຫະກິດກ່ຽວຂ້ອງຫາກນຳໃຊ້ລະບົບຄອມພິວເຕີ ແລ້ວ ອປສ ຈະສະໜອງແບບມາດຕະຖານ(ສູດ) ທີ່ໃຊ້ສຳລັບການຄິດໄລ່ເງິນສົມທົບໃຫ້ ຊຶ່ງເອີ້ນວ່າແບບຟອມ ອປສ SSO2-02. ແຕ່​​ໃນ​ເວລາ​ແຈ້ງ​ຈ່າຍ​ເງິ​ນສົມທົບ​​ນັ້ນ ວິ​ສາ​ຫະກິດ​ຕ້ອງ​ໄດ້​ພິມ​ແບບ​ຄິດ​ໄລ່​ເງິນ​ສົມທົບ​ດັ່ງກ່າວອອກ​ເປັນ​ເອກະສານ​ໃຫ້ ອປສ ລວມທັງ​ແບບ​ແຈ້ງ​ຈ່າ​ຍ​ເງິນ​ສົມທົບ ອປສ 2-01 ທີ່​ພະນັກງານ ອປສ ຕ້ອງ​ໄດ້​ລົງ​ລາຍ​ເຊັນ ​ແລະ ປະ​ທັບ​ກາ​ໄວ້.
   

2. ການຄິດໄລ່ ແລະ ຂັ້ນຕອນການຈ່າຍເງິນສົມທົບ:
   

   ການ​ຄິດ​ໄລ່​ເງິນ​ສົມທົບ​ຂອງຜູ້​ອອກ​ແຮງ​ງານ​ແຕ່ລະຄົນ ​ແມ່ນ​ອີງ​ຕາມ​ເງິນ​ເດືອນ​ຕົວ​ຈິງ​ຂອງ​ຜູ້ກ່ຽວ​ໃນ​ເດືອນ​ນັ້ນ ​ໂດຍ​ມີ​ເພດານ​​ເງິນ​ເດືອນ​ທີ່​ນຳ​ມາ​ຄິດ​ໄລ່​ເງິນ​ສົມທົບສູງ​ສຸດ 1,500,000 ກີບ/ຄົນ ໝາຍ​ຄວາມ​ວ່າ​ຜູ້​ອອກ​ແຮງ​ງານ​ໃດ​ທີ່​ມີ​ເງິນ​ເດືອນ​ຫຼາຍ​ກວ່າ 1,500,000 ກີບ ກໍ​​ໃຫ້​ເອົາ​ພຽງ​ແຕ່ 1,500,000 ກີບ ​ເທົ່າ​ນັ້ນ​ມາ​ຄິດ​ໄລ່.

   ການ​ຈ່າຍ​ເງິນ​ສົມທົບ ຕ້ອງ​ຈ່າຍ​ເປັນ​ລາຍ​ເດືອນ ​ແລະ ຊ້າ​ສຸດ​ຕ້ອງ​ບໍ່​ໃຫ້​ກາຍ​ວັນທີ 15 ຂອງ​ເດືອນ​ຖັດ​ໄປ. ຜູ້​ໃຊ້​ແຮງ​ງານ ມີ​ພັນທະ​ນຳ​ເອົາ​ເງິນສົມທົບ​ທັງ​ໝົດ ທັງ​ສ່ວນ​ທີ່​ເປັນຄວາມ​ຮັບ​ຜິດ​ຂອງ​ຕົນ​ເອງ ​ແລະ ສ່ວນ​ທີ່​ເປັນຄວາມ​ຮັບຜິດຊອບ​ຂອງ​ຜູ້​ອອກ​ແຮງງານ ມາ​ຈ່າຍ​ເຂົ້າກອງ​ທຶນປະກັນ​ສັງຄົມ.

   ຜູ້​ໃຊ້​ແຮງ​ງານ​ສາມາດ​ຈ່າຍ​ເງິນສ​ົມທົບ​​ເຂົ້າ​ກອງ​ທຶນ​ປະກັນ​ສັງຄົມ​ຜ່ານ​ບັນຊີ​ທະນາຄານທີ່ ອປສ ກຳນົດ​ໃຫ້ ​ໂດຍ​ສາມາດ​ໂອນ​ເງິນ​ເຂົ້າ​ບັນຊີ​ດ້ວຍ​ເງິນ​ໂອນ, ດ້ວຍ​ແຊັກ ຫຼື ກໍ​ໄດ້.

   
   

3. ການປັບໃໝໃນກໍລະນີຈ່າຍເງິນສົມທົບຊັກຊ້າ:
   ການບໍ່ປະຕິບັດພັນທະໃນການຈ່າຍເງິນສົມທົບ ຫຼື ຈ່າຍເງິນສົມທົບຊັກຊ້ານັ້ນ ຜູ້ໃຊ້ແຮງງານຈະ ຕ້ອງໄດ້ຈ່າຍເພີ່ມອີກ 2% ຂອງຈຳນວນເງິຍສົມທົບທັງໝົດ ເພື່ອເປັນຄ່າປັບໃໝ ຕາມໄລຍະການຄ້າງຈ່າຍ ທີ່ໄດ້ລະບຸໄວ້ໃນລະບຽບການຂອງ ອປສ.

ການໂອນເງິນເຂົ້າບັນຊີທະນາຄານຂອງ ອປສ:
ຜູ້ໃຊ້ແຮງງານສາມາດຈ່າຍເງິນສົມທົບເຂົ້າກອງທຶນປະກັນສັງຄົມ ໂດຍການໂອນເງິນເຂົ້າບັນຊີຂອງ ອປສ ຕາມທະນາຄານດັ່ງຕໍ່ໄປນີ້:

ໃນການໂອນເງິນເຂົ້າບັນຊີທຸກຄັ້ງ ຕ້ອງປະຕິບັດຕາມຂັ້ນຕອນດັ່ງນີ້:

• • ວິສາຫະກິດຕ້ອງໄດ້ກະກຽມ ແລະ ປະກອບແບບຟອມ ອປສ 2-01 ແລະ ອປສ 2-02 ຢ່າງລະ 3 ສະບັບ ໂດຍພາຍຫຼັງທີ່ທະນາຄານໄດ້ລົງລາຍເຊັນ ແລະ ປະທັບກາລົງໃນແບບຟອມ ອປສ 2-01 ແລ້ວ ວິສາຫະກິດກ່ຽວຂ້ອງຕ້ອງໄດ້ເກັບຮັກສາເອກະສານ 1 ຊຸດໄວ້ສຳລັບເປັນຫຼັກຖານອ້າງອີງສຳລັບວຽກບັນຊີຂອງຕົນເອງ ແລະ ສ່ວນທີ່ຍັງເຫຼືອ 2 ສຳບັບນັ້ນ ຕ້ອງນຳສົ່ງໃຫ້ ອປສ.

• • ສຳລັບເອກະສານປະກອບອື່ນໆທີ່ໃຊ້ກັບແບບຟອມທັງສອງຊະນິດນັ້ນ ວິສາຫະກິດຕ້ອງໄດ້ເກັບຮັກສາສະບັບຕົ້ນໄວ້, ອີກສະບັບໜຶ່ງທະນາຄານຈະເກັບຮັກສາໄວ້ ເພື່ອເປັນເອກະສານ ອ້າງອີງ ແລະ ສະບັບທີສາມຕ້ອງໄດ້ແນບຕິດມາກັບແບບຟອມສະແດງການຈ່າຍເງິນສົມທົບ ແລ້ວມອບໃຫ້ ອປສ.

• • ສຳລັບຂໍ້ມູນສຳຄັນທີ່ຕ້ອງໄດ້ປະກອບລົງໃນແບບສະແດງການຈ່າຍເງິນສົມທົບນັ້ນ ປະກອບດ້ວຍ: ລະຫັດວິສາຫະກິດ, ຊື່ວິສາຫະກິດ ແລະ ລະບຸພ້ອມວ່າເງິນດັ່ງກ່າວເປັນເງິນສົມທົບຂອງເດືອນ ແລະ ປີໃດ. ຈຳນວນເງິນສົມທົບລວມທັງໝົດຕ້ອງໃຫ້ກົງກັບຕົວເລກທີ່ໄດ້ລະບຸລົງໃນແບບຟອມ ອປສ 2-01.

ຫຼັກການສຳລັບການຈ່າຍເງິນສົມທົບດ້ວຍແຊັກ:

•  ອປສ ຈະ​ຮັບ​ພຽງ​ແຕ່​ແຊັກ​ທີ່​ເປັນ​ຂອງ​ທະນາຄານ​ທີ່​ຕັ້ງ​ຢູ່ ສປປ ລາວ ​ເທົ່າ​ນັ້ນ.
• ​ແຊັກ​ນັ້ນ ຕ້ອງ​ເປັນ​ແຊັກ​ທີ່​ສັ່ງ​ຈ່າຍ​ໃນ​ນາມ​ວິ​ສາ​ຫະກິດ​ກ່ຽວຂ້ອງ. ຢ່າງ​ໃດ​ກໍ​ຕາມ ອປສ ກໍ​ຍັງ​ຮັບ​ເອົາ​ແຊັກ​ທີ່​ອອກ​ໂດຍ​ໃນ​ນາມ​ບຸກຄົນ​ເຊັ່ນ​ກັນ.
• ​ແຊັກ​ດັ່ງກ່າວ​ຕ້ອງ​ເປັນ​ແຊັກ​ທີ່​ທະນາຄານ​ຍອມຮັບ​ໄດ້ ​ແລະ ຕ້ອງບໍ່​ມີ​ຮອຍ​ລຶບ ຫຼື ຮອຍ​ເປື້ອນ ຕ່າງໆ.
• ​ແຊັກ​ນັ້ນ ຕ້ອງ​ສັ່ງ​ຈ່າຍ​ໃຫ້​ແກ່ “ອົງການປະກັນສັງຄົມ” ຫຼື “ກອງ​ທຶນ​ປະກັນ​ສັງຄົມ”;
• ​ແຊັກ​ດັ່ງກ່າວ​ຕ້ອງ​ມີ​ໄລຍະ​ການ​ສັ່ງ​ຈ່າຍ​ລ່ວງ​ໜ້າ​ບໍ່​ເກີນ 10 ວັນ ​ແລະ​ວັນ​ດັ່ງກ່າວຕ້ອງຢູ່​ໃນ​ຂອບ​ເຂດ​ໄລຍະ​ເວລາ​ທີ່​ວິ​ສາ​ຫະກິດ​ຕ້ອງ​ຈ່າຍ​ເງິນ​ສົມທົບ​ເຂົ້າ​ກອງ​ທຶນ​ປະກັນ​ສັງຄົມ ຕາມ​ທີ່​ໄດ້ກຳນົດ​ໄວ້​ໃນລະບຽບການ​ຈ່າຍ​ເງິນສ​ົມທົບຂອງ ອປສ.
  
  

ການປະກອບແບບສະແດງການຈ່າຍເງິນສົມທົບ

• ວິສາຫະກິດທີ່ໄດ້ຂຶ້ນທະບຽນປະກັນສັງຄົມນຳ ອປສ ຕ້ອງໄດ້ປະກອບແບບຟອມແຈ້ງຈ່າຍງິນສົມທົບ ອປສ 2-01 ແລະ ອປສ 2-02. ສຳລັບ: ລະຫັດວິສາຫະກິດ ນັ້ນ ອປສ ຈະເປັນຜູ້ອອກໃຫ້ແລະລະຫັດດັ່ງກ່າວຈະສະແດງໃຫ້ເຫັນຢູ່ທີ່ໃບຢັ້ງຢືນການຂຶ້ນທະບຽນນຳ ອປສ.

• ໃນເວລາຈ່າຍເງິນສົມທົບ, ແບບສະແດງການຈ່າຍເງິນສົມທົບ (ອປສ 2-02) ຕ້ອງຖືກປະກອບຢ່າງຄົບຖ້ວນທຸກຄັ້ງ ແລະ ພ້ອມທັງຕ້ອງໄດ້ແຈ້ງບັນດາລາຍຊື່ຂອງຜູ້ອອກແຮງງານທີ່ໄດ້ຈ່າຍເງິນສົມທົບໃນເດືອນນັ້ນເຂົ້ານຳ. ຖ້າຈຳນວນຜູ້ອອກແຮງງານເພີ່ມຂຶ້ນຫຼາຍຈົນມີລາຍຊື່ເກີນຂອບເຂດແບບຟອມທີ່ ອປສ ໄດ້ສະໜອງໃຫ້ນັ້ນ ກໍໃຫ້ປະກອບໜ້າເຈ້ຍໃບໃໝ່ເຂົ້າເລື້ອຍໆຈົນພຽງພໍກັບລາຍຊື່ຂອງຜູ້ອກແຮງງານ.ຈຳນວນເງິນສົມທົບລວມທັງໝົດທີ່ໄດ້ລະບຸລົງໃນແບບອປສ 2-02 ຕ້ອງໃຫ້ກົງກັບຈຳນວນລວມທີ່ໄດ້ລະບຸໄວ້ໃນແບບ ອປສ 2-01 ຊຶ່ງໃນແຕ່ລະໜ້ານັ້ນວິສາຫະກິດຕ້ອງໄດ້ລົງລາຍເຊັນ ແລະ ປະທັບກາກຳກັບໄວ້.

• ຈຳນວນເງິນສົມທົບທີ່ວິສາຫະກິດຈ່າຍເຂົ້າກອງທຶນປະກັນສັງຄົມ ຕ້ອງເທົ່າກັນກັບຈຳນວນເງິນສົມ ທົບທັງໝົດທີ່ໄດ້ລາຍງານຢູ່ໃນແບບຟອມ ອປສ 2-01.

• ຊື່ ແລະ ນາມສະກຸນຂອງຜູ້ອອກແຮງງານທີ່ລະບຸຢູ່ໃນແບບຟອມ ອປສ 2-02 ຕ້ອງໃຫ້ຖືກຕ້ອງກັບຊື່ ແລະ ນາມສະກຸນທີ່ໄດ້ລະບຸໄວ້ໃນບັດປະກັນສັງຄົມຂອງຜູ້ກ່ຽວ. ຜູ້ໃຊ້ແຮງງານ ຕ້ອງກວດກາເລກລະຫັດປະກັນສັງຄົມຂອງຜູ້ອອກແຮງງານແຕ່ລະຄົນໃຫ້ຖືກຕ້ອງທຸກໆເທື່ອທີ່ມີການຈ່າຍເງິນສົມທົບ ເພື່ອຫຼີກເວັ້ນຂໍ້ຫຍຸ້ງຍາກສັບສົນຕ່າງໆ.