ອົງການປະກັນສັງຄົມຈັດພິທີເປີດຫ້ອງການສາຂາແຂວງສະຫວັນນະເຂດຢ່າງເປັນທາງການ
ໃນຕອນບ່າຍຂອງວັນທີ 24 ຕຸລາ 2005 ນີ້ ອົງການປະກັນສັງຄົມ ໄດ້ຈັດພິທີເປີດການນຳໃຊ້ຫ້ອງການ ສາຂາແຂວງສະຫວັນນະເຂດຂອງຕົນ ຂຶ້ນຢ່າງເປັນທາງການ. ໃຫ້ກຽດເປັນປະທານໃນພິທີຄັ້ງນີ້ ໄດ້ແກ່ທ່ານ ເລ ກາກັນຍາ ຮັກສາການລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ, ທັງເປັນ ປະທານສະພາບໍລິຫານ ອປສ ແລະ ທ່ານ ວິໄລວັນ ພົມເຂ, ເຈົ້າແຂວງແຂວງສະຫວັນນະເຂດ ໂດຍມີບັນດາ ກຳມະການສະພາບໍລິຫານ, ສະພາການແພດ, ຄະນະອຳນວຍການ ແລະ ພະແນກການຂອງອົງການປະກັນ ສັງຄົມ, ບັນດາພະແນກການອ້ອມຂ້າງແຂວງສະຫວັນນະເຂດ, ໂຮງໝໍແຂວງ ພ້ອມດ້ວຍແຂກທີ່ຖືກເຊີນເຂົ້າ ຮ່ວມ ຢ່າງພ້ອມພຽງ.
ສຳລັບແຂວງສະຫວັນນະເຂດ ມີຫົວໜ່ວຍວິສາຫະກິດກຸ່ມເປົ້າໝາຍ ຕາມການບັງຄັບໃຊ້ຂອງ ດຳລັດ 207/ນຍ ຄື: ເປັນວິສາຫະກິດທີ່ມີຈຳນວນພະນັກງານແຕ່ 10 ຄົນຂຶ້ນໄປ ທັງໝົດປະມານ 177 ວິສາຫະກິດ ຊຶ່ງກວມເອົາຈຳນວນຜູ້ອອກແຮງງານທັງໝົດປະມານ 14 ພັນກວ່າຄົນ.
ສຳລັບໂຮງໝໍທີ່ຈະເປັນບ່ອນສະໜອງການປິ່ນປົວສຸຂະພາບ ໃຫ້ແກ່ຜູ້ປະກັນຕົນ ແລະ ຄອບຄົວຂອງເຂົາ ເຈົ້າ ກໍແມ່ນໂຮງໝໍແຂວງສະຫວັນນະເຂດເອງ ຊຶ່ງຖືວ່າເປັນໂຮງໝໍທີ່ໃຫຍ່ ແລະ ທັນສະໄໝທີ່ສຸດຢູ່ພາຍໃນ ແຂວງ. ສຳລັບກົນໄກການຈ່າຍເງິນຂອງຫ້ອງການສາຂາ ອປສ ໃຫ້ໂຮງໝໍນັ້ນ ຈະໄດ້ນຳໃຊ້ລະບົບຈ່າຍເງິນ ມອບເໝົາເຊັ່ນດຽວກັນກັບສຳນັກງານໃຫຍ່. ການຂະຫຍາຍສາຂາ ອປສ ມາສູ່ແຂວງສະຫວັນນະເຂດ ໃນຄັ້ງ ນີ້ ກໍ່ເພື່ອເປັນການສະໜອງລະບົບປົກປ້ອງທາງສັງຄົມໃຫ້ແກ່ຜູ້ອອກແຮງງານ ຢູ່ພາຍໃນແຂວງ ໃຫ້ມີຊີວິດ ການເປັນຢູ່ທີ່ດີຂຶ້ນ ທັງເປັນປະຕິບັດຕາມຍຸດທະສາດການດຳເນີນງານຂອງ ອປສ ທີ່ຂະຫຍາຍຂອບການ ຄຸ້ມຄອງຂອງຕົນໃຫ້ກວມເອົາຜູ້ອອກແຮງງານໃນທົ່ວປະເທດເທື່ອລະກ້າວ ໂດຍການເລີ່ມຕົ້ນຂະຫຍາຍ ສາຂາອອກສູ່ແຂວງທີ່ມີເງື່ອນໄຂ. ເຫດການດັ່ງກ່າວມັນໄດ້ເປັນໄມ້ຫຼາວັດແທກອັນສຳຄັນ ໃຫ້ແກ່ການເຕີບ ໃຫຍ່ຂະຫຍາຍຕົວຂອງ ອປສ.